Hebrews 11

Keheli ule'ale huse hapa'a

1Keheli ule'ale husemofihi hapa'a ma luto ni'ibe. Ana'ina le'mo bati nohu letana yana'mugopa keheliya ito fifa ito minoto yanamofihi geba hulatana to bu mego'ehilutana'mu komopatitu le'mo pili koto lito nohilune. 2Mono bona'i koyapa'i minete ho tite hi'ahanamagi keheli ule'ale hite minelata hi'ahana'a yamofihi Hu'mau bu enagago laga hulata hu'ehina yabe.

3Koyapa'i ya'ma Hu'mamofihi ka'alo metoga nasana kokulumagu nasana hiti bu golata nohuta nasana huto hu'ehinamo yamofihi bu megose suhi hinaguti huto hu'ehinamo ni'ibe, luto keheli ule'ale huto minototi keheliya ito keheli'ohune.

4Ebeliu keheli ule'ale huse'na'a hiti amuya moloto ni'inalo Hu'mamofihi kuguhi koyo emi'ehinamofihi Hu'mau bu gago bati hu'ehina. Kenihi mone'na ya'ma bu go sibina hu'ehina. Keheli ule'ale huse'na ya'ma Hu'mau Ebelihi bu gago foipana'a meminago minoto kuguhi koyo emilago li'ehina yamofihi hapa 'a analoti li huto hu'ehina. To keheli ule'ale huto minana'mu luto lali kehelutogo Ebeliu fili'ehinaya sibigopa ka'a lu limilata nohibe luto kehelilune.

5Inokiu ai keheli ule'ale hulata bo minago Hu'mau ai bu go bati huloto filise'na ya'ma aitoga huto mehilibe luto mino kosaba huse gufa hiti le'moto kokulumagu ti'ehina. Ya hu eto'ehina'mu ya'ma bona'magi ai kumu lite sa sa hite be mege'ahana. To meti'ehigo ai hapa'amu ya'ma Hu'mau Inokihi bu go laga hu'ehinamo ni'ibe lite mono bukugu fayahi keye'ahanamo ni'ibe. 6Keheli ule'ale huse'nati meeminenogo nehinogoti Hu'mau bu goto fokehi melilibe. Hu'ma ai'a nohibe luto yamofihi keheli ule'ale huto to ai hapa'amu amuya melete sa sa hilana bona'magi ya'ma mina'a limilibe luto komopatitu keheliya ito ai maha'aluga buse'na ni'ibe.

7To Noa ai keheli ule'ale huse'na'a hiti bo mino'ehina Hu'mau alihi lipoti molo emilago ekesa kehelito kohe toto ka'a ekesa lito lu emigo Noau ya'ma kagalo keheli amuya moloto yagapana'a hiti enubuto bito minalabe luto ya'ma luloto nagamilugu boti sipi'a lolo hu'ehina. Ya huloto Noau Hu'mamofitoga agoya hu emito keheli ule'ale hilata yana'mu Hu'mau lamana bo nohane luto lu molo'ehina yauba ya'ma melugu bona'i foipana li'ahana'amagihi enifisa i'ehina suhi huto mino'ehibe.

8Abalahau keheli ule'ale huse bo mino'ehina Hu'mau kehe ito ai me'i mone enali felisa fe'nohi minalibe luto kele'mo bati hilugi kai mekagati he'miloto mone kegi'a buto minalane luto kaga lu moloto lu emigo keheli emito me'i magafi hiya'agafi lu'ehina ya'ma mekehelise fa'mene agoya hu emito bu'ehina yabe. 9Keheli ule'ale huse bo minana'mu luto me'i bu go molo eto'ehina yalo buto nehetiloto fa'mene minoto ka'i logo lili bo suhi huto yege nohi gito anagu koto mino'ehina. To Isaka to Yakopu etali hiti analo ya'ma Hu'mau lu molo epolo'ehina nasana'a lolo hite minete anamofihi gupisalo mine'aha'ina. 10Abalahau ai keheli ule'ale huse'namofihi lapusa'a hiti nohi hepa'i mone minoba minoba huse'i ya'ma Hu'mau minalinamofihi nasana'a lolo hu moloto li huto hu'ehina yanasimuko geba huto mino'ehina.

11Selau ai namopa litana'i nohigo Abalahau ai keheli ule'ale hulata bo minoto oyafa loloto yagapana'a ketalina kana'a su hago amuya emigo yagapana'a hiti hu'ehina. Hu'mau ya'ma bulo lu emilago legeya'a huto hulata nohina bouba lu huto hibe luto keheli amuya moloto ya suhi lolo hu'ehina yabe. 12To yamofihi ya'ma bona'i monekoluguti pulu tilatanamofihi amuya'a su ho'ehinalo aitogati yagapana'a pulu ti'ahana enali kokulumatoga sonofi'i mineme bite ete samahi netina yanamofihi babeyafalo to hege nagami beleha'aga kehe'i ni'ina ya suhi huto bona'magita leka so su mehaluta Abalahahi tata'amagihi legegeto huto helite bi'ahana.

13Bona'i ya hana'amagi keheli ule'ale hite minete filite bi'ahana'a enali Hu'mau lu molo'ehinamofihi ana'ina enele'mo keta mehuse'namofihi legeya'a ya'ma mele'isi meli'ahana, fa'mene foto'i ni'igo be gelete ka'a lite kehelite li pili kete mine'ahana. Ya hite minete, hapa'ani ma lite keheli'ahana: Lali fa'mene metoga minoto bonoho bona to ka'i logo lili bona tegi huto nohune lite keheli'ahana. 14Kaga'a ya'ma lite lilata nehana bona'magi koto hepa'ani mone li huto hilune'mu komopa'anitu kehelite mine'ahana yamofihi mino kosaba huse hepa'i huto hilina'a geba nehabe. 15Ya hilete enali nohi hepa'ani to me'ani he'mi'ahana yana'mu eniginaga figo mone kehelite ya mehi'ahana. Yana'mu epesigo ni'itita i behe hite fa'mene atine. 16Enali ya'ma nohi hepa'i lamana'a mone lilune'mu yabe lite ya nasana'muko geba hite keheli'ahana. Kokulumalugu yamofi kumuko keheli amuya mele'ahana. Ya hu'ehina'mu enali Hu'ma ai kumu Hu'matiga yabe lite lago kehelito megesa hu meepilata nohibe. Ya'ma hena'mube? Ai'a nohi hepa'i mone li huto huto enele'mo nupa hu'ehina'mu yabe.

17To Hu'mau Abalahahi fi taga hu etago keheli ule'ale hulata bo nohibe luto Isakahi lepa ito kuguhi koyo emilube luto keheligo amuya molo'ehina. Ai'a yagapana'amu Hu'mau lu molo eto'ehina kaga ya'ma li pili koto keheli'ehina bo nohinaya pana'a moneko'i ya'ma lepa ito kuguhi kayalube luto keheli moneko hu'ehina. 18To Hu'mau ka'a ma luto lu emi'ehina:Isakatogati panana'a huto pulu tite bite minalana'mu yabe. 19Abalahau ai Isaka kumu ma luto keheli'ehina ni'ibe. Hu'mau ai Isakahi fililinaguti le'mo ho tilibe, luto yamofihi keheli amuya moloto li'ehina bo to yamofihi fili'ehinaguti le'mo behe hu'ehina ya suhi lolo hibe luto keya'i molo etoto lu'ehina.

20Isakau ai keheli ule'ale hulata bo mino'ehina'mu luto ana'ina alihi huto hilinamofihi ka'a Yakopuhi to Isauhi kaga lu moloto lu etimito lusa gi etoto'ehina yabe.

21Yakopu ya'ma keheli ule'ale huse bo nohibe luto fililube'mu nohuto Yosefehe pana'a loemo lusa gi etoto'ehina. Ya huloto fatusalo lito ho tito Hu'mamofihi lipi emito fokehi li'ehina.

22Yosefeu ai keheli ule'ale huse bo nohibe luto fililina kana'a tupa nohigo Isilaeli bona'i enali minete Iyipi metoga he'mite bilana'mu yabe luto kehelito ai'a felisa'amu kohe toto lu laga huto ma luto lu epi'ehina: Bilune'mu nehitemo ya'ma nani'ni felisa'ni hiti lite bilo.

23Moseu huto hulago ito'afugo afo'afugo ya'ma keheli ule'ale hilata alobole neha'ibe lite yagapana'atiti'mu pana'i hetofanamo ni'ibe lite bu go laga hilete Iyipi bo Felo, gihiti bo ai lagaso pana'i asaga'i kele lilo, luto kaga moloto lina'mu yabe lite yamofihi etali etelesa meligo keheli he'mi'aha'ina. Ya nehite ikahi loebe monebe nobigo le'mo fala kite le'mo melete mine'aha'ina yabe.

24To Moseu keheli ule'ale huto minoto hofa tago Felohi pa'amofihi pana'a yabe lite lilata nehago Moseu o'e luto ya'ma nani ai pana'a yatai menohube luto lu'ehina yabe. 25To foipana nasanamofihi laga'a hiti tupa kana mino laba huto meminose'namofihi ya'ma he'miloto Hu'mamofihi bona naga'a enali hiti keke luse'namofihi gupisa'alo nehago yalo ai hiti molo emito kehelilube luto mino eto huto mino'ehina. 26Ya huloto Iyipi metogati mone fe'no hiti mina'a sipi ana'ina ya'ma lilina kanamofihi keheligo fa'menena lolo nohigo Hu'mau gulu ho letalibe luto lu molo eto'ehina bo, Mesia kumu yabe lite eniginaga fina'a gupisalo minalube luto yamofihi keheli ule'ale huto legeya'a lolo hu'ehina. Yamofihi minomo tito mina'a huto hilina'a lilube luto ana kaga'mu kehelito li pili koto ya suhi hu'ehina.

27To Moseu ai keheli ule'ale hu'ehina'mu yabe luto gihiti bo, Felohi ita bilata nohina'mu ya'ma lesa meligo keheli he'mito Iyipi me'i ya'ma he'mi'ehina. He'miloto i behe huto aku'i analo mebulata nohuto Hu'mamofihi bu megolatanamofihi ai bu'atu bu go'ehina lolo higo aitoga buto i kolo'ehina yabe. 28To Moseu ai keheli ule'ale hu'ehina'mu yabe luto ligo mone nose'na sipisipi yaga hete keye lete bauna lilata nohina'mu Pasa yabe lite ana yagamofihi golahi kasito luga luga lepe tepe hite mine'ahana ya'ma nose'na kana Moseu lu laga huto lu molo'ehina ka'a Isilaeli bona'magi keheli'ahana. Enali yege pana'ani nehago enoho fililana agelouba bulenogo enoho su ho lalibe luto ligo enali ana golaha'atu nohi kasihi yafalo fele'ahana.

29Isilaeli bona'i enali keheli ule'ale hi'ahana'mu yabe lite hege nagami'mofihi gi'a golaha nagamilugu li hokolo hu epalago ya'ma me'i kuguta hinaga bi'ahana. To Iyipi bona'magi ete ya'ma ana hite bilune lite ana sepa ina kapogu nebago hege nagami'uba enele'mo iti kago supa ne'ahana.

30Isilaeli bona'magi keheli ule'ale hise bona'i nehabe lite ya'ma Yeliko hepato efaha gegisalo ya'ma fi bego bego hite tibite kana 7 yege yupahi su nohago sipi gegisa'ani limilibe lite nebago fululu poto ko'ehina yabe. 31Kapogu mokolo a'i Lehapu ai keheli ule'ale hina'mu yabe lite bo loemale'i yata'a fateha'animofihi me'i be galu'ibe'mu fala kite bi'aha'ina. Lehapu ya'ma ana bole noha'agu etele'mo malago alihi Yeliko bona'i Hu'mamofihi ka'a pelesa ilata hi'ahanamagihi ya'ma Hu'mau enohoto Lehapuhi buto bi'ehina.

32Ya hi'ahanaya ka luga'a henabe luto lu su halube? Gitioni to Balaka to Semosoni, to Yepata, Tebiti, Samueli to kaga loli'ali bona'i enali kumu ka lu su hoto liluna'a huto ni'itita lolito nobugo yatama hitine. 33Enali keheli ule'ale nehana bona'i asaga'i nehabe lite luga'amagi melugu bona'i asaga'naloga enele'mete limite enebe ligi'ahana ya'ma enegekesa lise foya lite enele'mo fotoga hite Hu'mau mina'a epilube luto lu epolo'ehina yanamofihi legeya'a li'ahana. To luga'amagi lopi kalamagi heni letalabe lite ana kalamagihi enabagalo fi hekini le'ahana ya nehago, 34luga'amagi logo guluya mepofihi kenetufa'alo li sabago ketipa i'ehina. To luga'amagi lubamofihi gupisalo netite fateha'animagi emitatu keyete enoho fililune lana'a he'mi epelete bifa hi'ahana. Kenebe mebi'ahana'amagi aku'i ya'ma amuya mele'ahana. Luga'amagi lubagu amuya melete me'i luga'agati kala bo'ani enohobe logobe hi'ahana. 35Ana'i luga'amagi keheli ule'ale hina'mu yabe lite Hu'mau yagapana'ani fili'ahanaguti enele'mo ho tiloto aku'i ito'anigitoga enele'mo hepi'ehina.

To bona'i luga'amagi osahi enehete kalana'i mele epele'ahana ya'ma mono ka he'minogo lenubuto bilupihe lite kalana'i li epi'ahana aliha'aga lamana huse'nagu ho tilune lite kehelilete fateha'animagihi kaga keheli he'mite fili'ahana. 36Bona'i luga'amagihi fateha'animagi kiya hi epelete kalana'i mele epelete segi osatu enehe'ahana. To luga'amagi minago fateha'animagi enigito enayato naga'i gilete naga nonugu he'mi epele'ahana. 37Luga'amagi enali efa kosatu enehe fili'ahana, to luga'amagi ya'ma enugufa hobe laga hibe hi'ahana. To luga'amagi ya'ma sopolotu enehete enoho fili'ahana. Luga'a enali keheli ule'ale hite minana'mu yabe lite enoho lifi he'migo enali ka metoga bite fa'mene fakasalo minete to kosagu yupa'i hite minete, mehi kapoluga to muli kapoluga kete humofa'na hite mine'ahana. Ya hite minete, i kolo bise gu'ani meni'igo sipisipimagihi mememagihi kalupa'a lite i kolo bite minete kau'namu filite minete, musufalo bona'i ya suhi hite minete to fateha'animagi enegene mane igo keke'i luse'namofihi gupisalo tite mine'ahana. Ya hi'ahana bona'i luga'a enali henana'aniloti melugu i hepite minenogo bati hilibe?

39Ya hana'amagi enali asaga'i keheli ule'ale hago Hu'mau bu enogo laga higo bati hu'ehina. Ya huloto aku'i Hu'mau hetofa nasana epilube luto ya'ma kaga lu molo'ehinamofihi legeya'a ana kanalo metoga mine'ahana'a enali ya'ma meli'ahana. 40Henabe luto meli'ahana? Hapa'a ma huto ni'ibe. Hu'mau ai lalitoga ana'ina be ligito ni'ina'a molo letalube luto lu kehelito mino'ehina yamofihi enali kohe tete bati hite minalana'a ya'asigo meni'ibe. Alihi ya'ma lali hiti buto mino hepito bebe senogo minaluta nasana ya'ma li huto hilabe luto lu epolo'ehinamo ni'ibe.